Attention: this page is not being maintained any longer, the information given on this page is probably out of date, and links may not work

КАНѠ́НЪ ПОКАѦНЕНЪ
ко Го́споду на́шему І҄ису́су Хрїсту̀.

Пѣ́снь а҃.

І҄рмо́съ:

Я҆́кѡ по су́ху пѣшеше́ствовавъ Ізра́иль, по бе́зднѣ стопа́ми, гони́телѧ фараѡ́на ви́дѧ потоплѧ́ема, Бо́гу побѣ́дную пѣ́снь пои́мъ, вопїѧ́ше.

Поми́луй мѧ̀, Бо́же, поми́луй мѧ̀.

Ны́нѣ приступи́хъ а҆́зъ грѣ́шный и ѡ҆бремене́нный к тебѣ̀ Влады́цѣ и҆ Бо́гу моему̀: не смѣ́ю же взира́ти на не́бо, то́кмѡ молю́сѧ, глаго́лѧ: да́ждь мѝ, Го́споди, ѹ҆́мъ, да пла́чусѧ дѣ́лъ мои́хъ го́рькѡ.

Поми́луй мѧ̀, Бо́же, поми́луй мѧ̀.

Ѡ го́ре мнѣ̀ грѣ́шному! па́че всѣ́хъ человѣ́къ ѻ҆каѧ́ненъ є҆́смь: покаѧ́нїѧ нѣ́сть во мнѣ̀: да́ждь мѝ, Го́споди, сле́зы, да пла́чусѧ дѣ́лъ мои́хъ го́рькѡ.

Сла́ва оц҃у и҆ сн҃у и҆ ст҃ому дх҃у.

Безу́мне ѻ҆каѧ́нне человѣ́че, въ лѣ́ности вре́мѧ губи́́ши: помы́сли житїѐ твоѐ, и҆ ѡ҅брати́сѧ ко Го́споду Бо́гу, и҆ пла́чисѧ ѡ҆ дѣ́лѣхъ твои́хъ го́рькѡ.

И҄ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Ма́ти Бо́жїѧ пречи́стаѧ, воззрѝ на мѧ̀ грѣ́шнаго, и҆ ѿ сѣ́ти дїа́воли и҆зба́ви мѧ̀, и҆ на пу́ть покаѧ́нїѧ наста́ви мѧ̀, да пла́чусѧ дѣ́лъ мои́хъ го́рькѡ.

Пѣ́снь г҃.

І҄рмо́съ:

Нѣ́сть свѧ́тъ, я҆́коже ты̀, Го́споди Бо́же мо́й, вознесы́й ро́гъ вѣ́рныхъ твои́хъ, Бла́же, и҆ ѹ҆тверди́вый на́съ на ка́мени и҆сповѣ́данїѧ твоегѡ̀.

Поми́луй мѧ̀, Бо́же, поми́луй мѧ̀.

Внегда̀ поста́влени бу́дутъ престо́ли на суди́щи стра́шнѣмъ, тогда̀ всѣ́хъ человѣ҄къ дѣла̀ ѡ҆блича́тсѧ: го́ре та́мѡ бу́детъ грѣ҄шнымъ, въ му́ку ѿсыла́емымъ: и҆ то̀ вѣ́дущи, ду́ше моѧ̀, пока́йсѧ ѿ ѕлы́хъ дѣ́лъ твои́хъ.

Поми́луй мѧ̀, Бо́же, поми́луй мѧ̀.

Пра́вєдницы возра́дуютсѧ, а҆ грѣ́шнїи воспла́чутсѧ: тогда̀ никто́же возмо́жетъ помощѝ на́мъ, но дѣла̀ на҄ша ѡ҆су́дѧтъ на́съ. тѣ́мже пре́жде конца̀ пока́йсѧ ѿ ѕлы́хъ дѣ́лъ твои́хъ.

Сла́ва оц҃у и҆ сн҃у и҆ ст҃о́му дх҃у.

Оy҆вы̀ мнѣ̀ великогрѣ́шному! и҆́же дѣ́лы и҆ мы́сльми ѡ҅скверни́всѧ, ни ка́пли сле́зъ и҆мѣ́ю ѿ жестосе́рдїѧ, ны́нѣ возни́кни ѿ землѝ, душѐ моѧ̀, и҆ пока́йсѧ ѿ ѕлы́хъ дѣ́лъ твои́хъ.

И҄ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Сѐ взыва́етъ, Госпожѐ, Сы́нъ тво́й, и҆ поуча́етъ на́с на до́брое, а҆́зъ же грѣ́шный добра̀ всегда̀ бѣ́гаю: но ты̀, Ми́лостиваѧ, поми́луй мѧ̀, да пока́юсѧ ѿ ѕлы́хъ мои́хъ дѣ́лъ.

Го́споди поми́луй.